អាស៊ី៖ នៅក្នុងកិច្ចប្រជុំអូឡាំពិកលើកទី១១ ក្រុមប្រឹក្សាកីឡាអូឡាំពិកអាស៊ី (OCA) បានផ្តល់ឱកាសស្វាគមន៍ចំពោះការចូលរួមរបស់អត្តពលិកមកពីប្រទេសរុស្ស៊ី និងបេឡារុស្ស ក្នុងការប្រកួតអន្តរជាតិនៅអាស៊ីដែលស្ថិតក្រោមការរៀបចំរបស់ខ្លួន ខណៈហេតុផលនៃការរក្សាអត្តពលិកគឺជាស្មារតីស្នូលនៃការសម្រេចចិត្តនេះ។ 

យោងតាមព័ត៌៌មាន និងសេចក្តីសម្រេចនេះមានន័យថា អត្តពលិកដែលមកពីរុស្សី និងបេឡារុស្ស នឹងអាចចូលរួមការប្រកួតកីឡាកម្រិតអាស៊ីនានាទាំងឡាយបានរួមមាន ព្រឹត្តិការណ៍កីឡាអាស៊ី (Asian Game) កីឡាក្នុងសាលទ្វីបអាស៊ី (Asian Indoor) កីឡាក្បាច់គុន (Martial Arts Game) និងព្រឹត្តិការណ៍កីឡាកម្រិតទ្វីបអាស៊ីផ្សេងៗទៀត។ 

លោក Robin Mitchell ប្រធានសមាគមគណៈកម្មាធិការអូឡាំពិកជាតិ (ANOC) បានស្វាគមន៍ចំពោះគំនិតផ្តួចផ្តើម OCA ដែលជាជំហានដ៏សំខាន់មួយដើម្បីបង្កើតការរួបរួមនៃសមាជិកគណៈកម្មាធិការជាតិអូឡាំពិកទាំង ២០៦ ប្រជាជាតិឡើងវិញ។ គំនិតផ្តួចផ្តើមនេះនឹងត្រូវបានពិភាក្សានៅក្នុងជុំបន្ទាប់នៃកិច្ចពិភាក្សា IOC ជាមួយសមាជិក IOC តំណាងអត្តពលិក សហព័ន្ធអន្តរជាតិ និងគណៈកម្មាធិការជាតិអូឡាំពិកនៃភាគី និងប្រទេសសាមី៕